شرح دراسة كلية حاسبات ومعلومات - التراس حاسبات ومعلومات

اخر الأخبار

اعلان

اعلان

الجمعة، 15 سبتمبر 2017

شرح دراسة كلية حاسبات ومعلومات



باذن الله المقال ده هيكون فيه معظم اللي عايز تعرفه عن الحياة الجديدة اللي انت داخل عليها وهي فعلا حياة جديدة هتغير طريقة حياتك وتفكيرك بنسبة كبيرة البوست طويل بس لازم تقراه عافيه  
*الكلية :
بالبلدي كده اعتبر جهاز الكمبيوتر عربية ..العربيه بيتعامل معاها اتنين واحد بيصلح العيوب اللي فيها ولو حاجة اتعطلت وده مش انت ...وواحد تاني اللي هو عمرو مجايفر ده اللي بيمسك العربية وبيعملبيها البدع ويقعد يخمس وينط من فوق حاجات وكده ..انت عمرو مجايفر 💔    HKJ ت مسئول عن كل حاجة ع الكمبيوتر البرامج والنظام واي حاجة بتعمل وظيفة بمجرد ما تدوس ع زرار ومش الكمبيوتر بس ..ده باختصار
*المحاضرات والسكاشن :
هنا بقا اللي ممكن تحصل لمعظمكم الصدمة لانك هتلاقي طريقة شرح مختلفة تماما عن اللي كانت ف دروس ثانوي ...المدرس كان بيطبطب عليك ويفهمك باكتر من طريقة..لكن الدكتور مش كده هو بيشرح بطريقة اكادمية فهمت فهمت ...مفهمتش شيء ميخصهوش ...الحل ف كده انك تحاول تذاكر المحاضرة قبل ما تروح بحيث تروح المحاضره تحط النقط ع الحروف...
اما السكاشن فهي انهم بيقسموا الاعداد لحوالي 40 واحد حسب الاسم...هتقعد مع المعيد يحل معاك
*الدكاترة والمعيدين :
لازم تعرف ان الدكتور مش مدرس ثانوي اللي ممكن تهزر معاه او تتكلم معاه بطريقة وحشة..لانك ممكن تقعد ف الكلية بسبب مادته سنين كتير متعدهاش غير ف حاله واحده ان الدكتور يموت
اما المعيد هتلاقي سنه قريب لسنك حاول تسألة عن كل اللي واقف معاك...متقعدش مش فاهم ..اسأل المعيد اكتر مش الدوك
*المذاكرة :



💪
المواد بالانجلش ده مش شيئ معضل كلنا كانت عندنا رهبة ف الاول بس..اي كلمة تواجهك معاك برنامج بيترجم ترجمها علطول وسجلها ف كشكولك وابقي احفظها ....
هذاكر منين ؟
طبعا هيبقي ف كتب سواء اونلاين او ورقي ..وف محاضرات انت بتكتبها ورا الدوك تذاكر منهم ولو ماده عملية ذاكر من الكتاب اللي هو غالبا بيكون مرجع للغة البرمجة مثلا..وتحل كتير بايدك..البرمجه لازم تطبق لازم تطبق لازم تطبق ودي اهم ماده عندك ولازم يكون التركيز الاعلي عليها...اما باقي المواد أسال الدفعات القديمة ع نظام الدوك بيجيب الامتحان من الكتاب ولا المحاضرات وكده
*الموظفين اللي ف الكلية :
بصوا حاولوا متحتكوش مع اي حد منهم او توصل بيك انك تغلط ف حد..العلاقة بينكم مصلحتك فاطلبها باحترام بلاش يا شباب تاخدنا العصبية وتقعد تعلي صوتك ..لان ف ايده سلطة ممكن يحولك للتحقيق وممكن تتفصل لسبب ممكن يكون تافهه فانت هتضيع مستقبلك ع الفاضي انت طالب جامعي محترم اتعامل بكده 


*زملائنا :
احنا كبرنا جو ثانوي انك تبقي قاعد ماسك الكتاب 24 ساعه وتقعد تحلف 100 يمين انك مبتذاكرش..الكلام ده مش هينفع ساعد زمايلك..تعرف حاجة اوعي تبخل بيها ع غيرك..لما تساعد زمايلك انت مبتخسرش حاجة انت بتكسب حب الناس..لو زميلك جاب تقدير ده مش هينقص منك حاجة ها
بالنسبة لتعامل الشباب مع البنات ..خرج من دماغك جو افلام 2004 ده ..وانت مش الشبح اللي مفيش منك اتنين ..هيبقي ف تعامل بينكوا اه بس بيبقي ف بروجكت تسليم كده ..بتكون علاقة احترام..بلاش الجو اللي بيتعمل بره ده انت طالب محترم وهييبقي شكلك وحش اوي
اي حد ليه سؤال يتفضل وف بوست تاني هنتكلم عن باقي الحاجة باذن الله 


بصو يا شباب المقال  ده اعتبروه شوية دردشة كده على حياتكو فى الكلية و الجامعة عامة و المجال الجديد اللى انتو داخلين فيه😇...فيه منكو اللى داخل المجال بمزاجه و فى منكو اللى دخله بالتنسيق بس ده مش موضوعنا عامة اللى يهمنى دلوقتى ان كلكو نورتونا فى حاسبات ايا كانت جامعة حضرتك ايه هى😅 مبدايا لازم تكونو عارفين ان عالم الجامعة عالم وااسع جداا بداية من الناس اللى هتتعرف و تتعامل معاهم لحد المواد و الامتحانات اللى هتتخانق معاها طول السنة😎🤨نظام الثانوية العامة هيتغير تماما ..يعنى مفيش مدرس هيشرحلك كل نقطة فى المنهج و مفيش مساعدين للمدرسين هيشرحولك اللى وقع منك فى الحصة و مفيش وحش الكيميا ولا اسطورة الفيزيا اللى هيعملو ملزمة ليك و تراجع منها ...خاالص الكلام ده كان دلع ايام الثانوية ولازم تمسحه من دماغك باستيكة 🙄 و كمان مفيش كتاب الوزارة اللى هييجى منه الامتحان عشان هو اللى فيه المنهج الرسمى و اقدر اقلك ان 90% مفيش كتب اصلا و مفيش الامتحانات اللى جاية من الادارة و مفيش "بوكليت" 😂 ده + بقى ان مفيش الاخصائية الاجتماعية اللى هتحل مشاكل حضرتك 😂 امال فى ايه؟!!🤨🤔 

فى ان حضرتك عندك فى التيرم حوالى سبع مواد لكل مادة فى محاضرة و فى سيكشن ..المحاضرة هيديها ليك "الدكتور" و بيكون مدتها من ساعتين لتلت ساعات..."كلام دكتور المادة سواء قاله او كتبه عالبورد" هو ده المنهج بتاعك...المصدر اللى الدكتور هيقلك عليه (سواء كان كتاب هتشتريه او هتنزله من عالنت pdf او كورس هتاخده اونلاين او الslides بتاعة الدكتور و دى عبارة عن "ملخص" للمحاضرة الدكتور بيشرح منها و بتبقى عالpower point و بتاخدوها من الدكتور بعد موافقته على فلاشة) هو ده كتاب الوزارة بالنسبالك 🤓 سلايدز الدكتور مش هى المنهج (خدو بالكو انى قلت انها ملخص للمحاضرة...يعنى هتلاقو فيها عناوين وانتو هتدورو عالشرح الاساسى...و ساعات بتكون هى المصدر الاساسى للمذاكرة بس ده على حسب نظام كل دكتور ...يعنى من الاخر مفيش نظام ثابت للمذاكرة فنخلينا صاحيين عشان منتغفلش يا باشمهندسين 😂😎

اما بالنسبة للسكاشن فدى هتاخدوها مع "معيد/ة" المادة...بيتقالو يا "باشمهندس/ة" ...المعيد تقدر تسالو على اى حاجة مش فاهمها و هيساعدك ان شاء الله...شغله معاك بيبقى عملى اكتر من النظرى....المعيد/ة بيكونو قريبين مننا فى السن فهتلاقو فى نسبة تفاهم بينكو و بينهم اكتر من النسبة اللى بينكو و بين دكتور المادة😇 

طبعا المحاضرات بتكون فى المدرجات😂😂 ...و السكاشن بتكون فى المعمل😂

بالنسبة لتقسيمة الدرجاات ...ففى مواد بيبقى ليها محاضرة و سيكشن او محاضرة و معمل و بالتالى فيبقى فى درجة غياب و حضور😴 ... بيبقى فى مواد ليها "امتحان عملى" و مواد تانية بيبقى فيها "مشروع" بدل "العملى" 🧐....كل المواد بيبقى فيها ميد تيرم و فاينال اكييد🤯....بيبقى فى "واجب بيتسلم اثناء التيرم بس مش هنسميه واجب ...فى الكلية بيبقى اسمه "شيت / Assigment / Task "😂 .... الحاجات دى بيبقى عليها درجاات و لازم تسلمها فى معادهاا😥 ... و لازم الحل يكون بمجهودك عشان اللى بينقل الحل من زميله و بيسلمه بيتقفش و العقاب بيبقى وحش وحتى لو عديت فانت كده ضريت نفسك و مستفدتش حاجة من اللى بتدرسه🤐...انت بتنقص درجتك و كمان بتاخد بال minus 😤😱..يعنى بتنقص درجات فوق درجاتك 😂 و فى ناس بتعمل اللى عليها و بتاخد Bonus برده😂😂😂 .... و لازم تبقو عارفين ان "درجة واحدة " ممكن تعديكو من المادة و نفس الدرجة دى ممكن لا قدر الله تشيلكو المادة 😐😒 
نحاافظ على الدرجاات على قد ما نقدر عشان فى "حااسباااات و معلوومااات" مش سهل انك تعدى من الماادة ... الدراسة حلوة و الكلية جميلة و كل حاجة بس بلاش نهزر فى الدرجاات عشان محدش يزعل فى الاخر و حاولو على قد ما تقدرو تجيبو درجاات كويسة فى الميدتيرم ده هيساعد معاكو جامد فى الفاينال😮🙄 

هتقابلو بقى ناس فى الكلية اسمهم "اتحاد طلبة / Student union" ...دول ناس محترمة جدا بيساعدوك و بيظبطولك الجداول بتاعة حضرتك و امورك كلها فى الكلية و بيكونو هما الوسيط بينك و بين ادارة الكلية واحيانا بينك و بين الدكاترة و دورهم مهم و ملحووظ جداا فيارييت لما تيجو تطلبو منهم حاجة تبقى باسلوب حلو عشان الناس دى بجد بتاخد من وقتها كتيير عشان تساعد الاربع دفعات كلهم😄😇 هتقابلو كمان "الانشطة الطلابية /Student activities" و دول برده ناس محترمة جداا هدفهم انهم يساعدووك و يوفرولك مصادر كويسة تذاكر منها و دايما هما بيبقو العنصر المنقذ ليلة الامتحان😂😂😍 هما دول بتوع الاوقات الصعبة😂😂😎 ده غير انك ممكن تنضم لاى اسرة منهم بهدف انك تفيد غيرك و كمان تكتسب soft skills كتيير من اللى هتحتاجها فى سوق العمل😎😁 

طيب بالنسبة لنظام المذاكرة بقا....حياتك كلها هتبقى مع صاحبك "جوجل" 😍و مع اليوتيوب و "كورسات اونلاين"😍 و كتبك معظمها هتبقى PDF 🤩 و المحاضرات و السلايدز بتاعة دكتور المادة☺️ 
هتمشى على نظام الSelf study وهو انك هتاخد البداية و هتفضل انت ماشى وراها لحد ما تجيب اخرها...يعنى ببساطة هتاخد العنوان و حضرتك هتفضل تلف حوالين نفسك عشان توصل لاعلى درجة من الفهم🤗 ...طيب لفيت و تعبت و موصلتش؟! 🙄يبقى تلجا انك تطلب من حد يشرحلك ياما هتروح للمعيد ياما هتسال حد من الدفعات الاكبر منك ياما هتسال زميلك لو كان هو فاهم مثلا 😉😄
دراستك كلها هتبقى بالانجلييزى🤠 مش صعبة و مش سهلة ... هتاخد بس وقت فى الاول عشان تتعود بس الموضوع مش مستاهل ان حد يبقى عايز ياخد كورس انجليزى...كورس الانجلش ده تاخده قدام شوية عشان تحطه فى السى فى...انما دلوقتى تبدا تدرب نفسك انك تتكلم انجلش كويس و تسمع انجلش كويس و كلها حاجات اونلاين مش مستاهلة انك تنزل لكورس مخصوص ولازم كمان تعود نفسك انك تقرا Texts كاملة بالانجلش لان معظم دراستك هتكون كده لو فيها جزء نظرى و كده

فى ناس كتير قالتلى انها متلخبطة و مش عارفة هى داخلة على ايه و المفروض تعمل ايه ...اول سؤال كده غالبا الرسالة وصلت و الناس عرفت هى داخلة على ايه 😄 تانى سؤال بقا المفروض تعملوه هو انكو فى الوقت ده تحضرو ايفينتات تعرفكو عالكلية اكتر و تقرو بوستات و تفهمو اكتر عن المجااال و يعنى ايه برمجة ...مطلوب منكو تاخدو فكرة عالاقل عن الC او ال C++ ....مش هياخد من وقتكو كتير انتو معظم الوقت بتبقو فاتحين فيسبوك و البوستات اللى بتعرفكو عالكلية بتبقى عالفيسبوك و اليوتيوب جمب الفيسبوك مش بعيد ممكن تخطفو فيديو كده عالسريع و تشوفوه بتركيز 😉😄
بس مش مطلوب منكو اكتر من كده🤗🤩😄

اخر حاجة بقا هتكلم فيهاا عشان عارفة انا رغييت كتيير فى البوست ده😂😂 حاولو يبقى ليكو صحاب فى الكلية سواء من دفعتكو او اكبر منكو ...اتبسطو بالاربع سنين على قد ما تقدرو مادام فى الحدود...احترمو بعض يا جمااعة عشان انتو هتعقدو فى وش بعض كتييير😂😄 الاحتراام اهم حااجة يا جماعة ولازم نبقى قد المسؤولية 😌 و ياريت بعد اذنكو محدش يتكلم على كليته بشكل وحش حتى لو هى وحشة😂 وحشة فى حقنا والله اننا نتكلم عن الكلية باسلوب مش حلو واحنا اصلا كليتنا اتعدت حدود انها تبقى كلية قمة😍😍محدش يبخل على زميله بمعلومة..انت دلوقتى لقيت اللى يساعدك فمتبخلش على غيرك بنفس المساعدة دى..و السنة الجاية انتو هتبقو مكاننا بتساعدو ناس تانية فخليكو قد المسؤولية😉

انا خلصت رغى خلاص😂😂 فى اقرب وقت هنزل ليكم معلومات اكتر عن ال ASCII system زى ما الناس طلبت ....

لو عايز تعرف المواد الي حتدرسها في سنة اولي من هنا
 لو عايز منهج حاسبات طول الاربع سنين من هنا 
لو عايز تعرف كل تخصصات حاسبات من هنا 



ليست هناك تعليقات:

إرسال تعليق

Post Bottom Ad